ليلة السبت الماضي عاشت منطقة دير البلح وقت صعب تحت القصف، بعرفش ليش ما خطرلي غير ولاء، بعتلها رسالة (ولاء طمنيني عليكي) الرسالة ما وصلت!
صديقنا المشترك حسام عبد ربه نازح زي حالاتنا بالدير، بعتلو رسالة (حسام بدنا نتطمن ع ولاء قاصفين الجامع يلي جمبهم)
لا حسام رد ولا ولاء.
الساعة 8:00 صباح يوم السبت زوجتي بتصحيني، حسام بالشارع بنادي عليك، قمت لبست ملابسي بسرعة بتحكيلي ياسر شو فيه! حكتلها ولاء سعادة استشهدت، مكانش وقتها حسام رد عليا ولا ولاء، لكن صحيت بطيف فقدانها، فعلاً قابلت حسام وعيونه حمر واتصلت ع اخوها وكان بعيط وبحكيلي نحنا بالمقبرة.
حوالي 6 سنين ونحنا بفريق عمل واحد، كل يوم نصبح ع بعض بس كان يوم السبت الصباح الأخير والفظيع، واقف بتفرج عالتراب يلي غطت آخر صباح! وآخر احتمالية لطلتك وضحكتك الصباحية.
مش حيكون فيه ولاء تحكيلي أبو الصالح صباح الخير أنا جوعانة يلا ناكل، مش حيكون فيه حدا يهرب يجيبلنا حلويات، مش حيكون فيه ولاء يلي حساسيتها عالية، ولاء يلي تلولح بمشيتها واحكيلها الله يستر من طلتك البهية، ولاء يلي أناديها دايماً وباء وولاق!
ولاء رافقتني بالسفر وكانت نعم الرفيق، ولاء كانت بالحرب مش لاقية مأوى وبتتصل تحكيلي ياسر أمانة فيه عيلة وضعهم صعب كيف بنقدر نساعدهم! ولاء عشنا معها أنا وزملائي أسامة وسمر وهيثم وكنا دايماً عيلة نفرح لبعض ونزعل عبعض ونحتفل بمناسباتنا ونوقفش نشتغل وناكل ونحكيلها يلا ناكل مشان حاسينك نحفانة شوية.
ولاء اجت ع دير البلح من شهرين، اشترينا قهوة من بياع عالرصيف كانت حكتلي قهوته زاكية، اليوم مريت من جمبه قام مسكني بحكيلي يا أستاذ انا شفت الصبية يلي بتشتري مني قهوة عالنت يا الله ايش انقهرت عليها البنت!
ولاء اشتغلت معنا بمحطة تحلية للمياه ونحاول نوفر مياه للناس، صاحب محطة التحلية نزلت دموعه ورجفت ايديه بس عرف استشهاد ولاء!
بمكان استشهاد ولاء كنت واقف، بالمكان يلي كان مفترض خيمة، بمكان نزف فيه دمك وانتي حاضنة وسن مشان ما تخاف، اجت ام ولاء تعيط وتحكيلي ماتت ولاء يا ياسر، وانا بس ساكت، صاروا اولادها يحضنوها بتحكيلهم استنوا بدي احكي لياسر انه ولاء ماتت!
ولاء أنا أكثر اشي قهرني أنه زملاءنا والناس بتصلو يعزوني أنا، حسيت اكتافي كتير اثقال بهالتعازي،
من الخيانة أقولك صباحاتنا انتهت، بس احنا كلنا مش حنخونك لانه بكل وقت انتِ بيننا وروحك معنا.
انتي الناجية يا ولاء، أرقدي بأمان وطمأنينة أختنا وصديقتنا والأكثر طيبة ونقاء وعفوية.
ياسر الحطّاب
٤/٣/٢٠٢٤
