أنا ليش بعد كل الرفاهية اللي كنت عايشة فيها ألاقي حالي فجأة هون؟
ليش أنا بخيمة وبنام مع ٥ أفراد وبصحى من ال ٥ ونص على الذبان وما بقدر أنام قبل نص الليل من صوت الطيران والخوف؟
ليش ما بقدر آخد راحتي بلبسي ومجبورة أضل مغطية أغلب الوقت؟
أنا ليش ما بشتغل بالوقت الحالي؟
ليش لما بدي أحكي مع حد ما بقدر أحكي كلمتين على بعضهم؟
ليش ضاع مني كلشي وضاعت مني كل المصطلحات؟
ليش لما بدي أشتري شامبو لازم ألف الدنيا وبالآخر ما ألاقي؟
ليش يكون نفسي باللحمة وما ألاقيها أو ما أقدر أجيبها؟
ليش يكون في مسافات بيني وبين أغلى ناس عقلبي وما بقدر أوصلهم؟
ليش ما بقدر أتحمم تحت الدش وأضل وقت طويل بدون خوف؟
ليش بغسل على ايدي؟
ليش بولع نار ومليون غلبة عشان كاسة قهوة؟
ليش لما بدي أحكي شغلة بلاقي كل الخيم سمعتها؟
ليش مش قادرة أسكر عحالي الغرفة وأبكي براحتي؟
ليش بشرتي خربت ولوني تغير مليون درجة؟
ليش مش قادرة آخد نفس؟
ليش كل هاد؟
ليش ما في عيد؟
ليش ما في سوق وجراي بآخر أيام عشان العيد قرّب ومش ضايل وقت؟
ليش ما في معمول وما في غلبة؟
ليش ما في أطفال بتجري وفرحانة وبتكبّر؟
وين احنا يا عالم؟
ليش هيك؟
ليش هيك؟
ايمان عودة
١٦/٦/٢٠٢٤
