المشكلة انه محدش حكالنا انه حنصحى من النوم تتغير حياتنا وتنقلب ١٨٠ درجة.
محدش حكالنا انه حيموتوا صحابنا ونطلعهم بإيدينا من تحت الركام، صحابنا ترا مش كلمة لاشخاص بنعرفهم من يومين لا !
صحابنا عشرة الجامعة والطفولة .
ولا حدا حكالي اني راح اشوف ناس من عيلتي اشلاء وما نعرف عمتي من بنتها من حفيدها كلهم قطع لحم صغيرة.
ومحدش حكالي برضو اني حصحى اخسر غزة يلي تربيت وعانيت وكافحت وفرحت وزعلت وغنيت وفلست واكلت وشربت وسبحت وغلطت وتأدبت فيها !
محدش حكالي اني حصحى من النوم الاقي العالم عرفني من اكثر شيء بكرهه، الحرب !
محدش حكالي انه لازم اخذ بالي من كلامي لاني دايماً يلي بقلبي على لساني.
محدش حكالي انه كل الاحلام يلي حلمتها حنساها لانه كلشي تغير وكلشي اختلف وبطلت انا هو انا .
مهوة محدش حكالي انه العالم يلي تمنيت الفه واسافر واصور وانشهر وانعرف وانجز فيه راح يعرفني برضو من موتي وحزني وقهري.
محدش حكالي انه محدش راح يشوف معاناتك وحياتك اليومية بغزة وبس راح يفكروك انخلقت للحرب وللموت.
محدش حكالي اني راح افقد شغفي واصير انسان كئيب وبس بده يضل لحاله
محدش حكالي.
معتز عزايزه
٧/١٢/٢٠٢٤
