ستي حبيبة قلبي سيده مكافحه وحنونه وقوية مش لانها ستي لا لانها فلسطينية زوجة شهيد وام ل٥ اطفال ترملت بعمر صغير وتجوزت بعمر صغير مع هيك كانت الام والاب وكانت قوية كتير تعرضت لمواقف كتير سيئة بحياتها ولو بدي احكي فا رح احكي كتير …
ستي بعد ما ربت ولادها وجوزتهم ابنهم الكبير توفت زوجتو وقررت ستي تعيد تربية اطفاله وكانت الام والجده الحنونه لحد ما كبرت وصارت بطلت تعرف تمشي ..
انا حاليا بعتني فيها متل ما اعتنت فيه درستني وما كانت تخلي اشي بنفسنا ..
ستي اصيبت بالزهايمر وللاسف ما بتتذكر حد غيري انا وامي…
ستي عندها عادة كنت دايما اسالها عنها يا ستي انتي ليش بتضلي حتى وانتي نايمه لابسه المنديل قالتلي يا ستي وانا حامل بعمتك الصغيرة اجو الجيش بطبلو علباب وتاخرت لفتحت عشان كنت بلبس بالمنديل قام الجندي ضربني بكعب الباروده واذاني كثير من يومها يا ستي ما شلحتو بخاف ييجو واتاخر !
ستي صحيح عندها زهايمر بس لحتى هاي اللحظه الي بكتب فيها ستي بتخاف ع اخواني وبتقول اوعو يطلعو اخوتك بالليل بلاش الجيش ييجو!
ستي نسيت كل ولادها واحفادها وهالعدو اللغين بشاعتو اقوى من الزهايمر
روان عويضة
طولكرم
25/03/2025
