خطر ببالي قفص الدجاج يلي بكون بمذابح اللحوم، قفص حديد مليان دجاج حي، وبيجي الذبّاح مجرد يفتح الباب بحاول الدجاج يهرب للنجاة لكن مهما يحاول يهرب هو بقفص، والدجاجة يلي حظها سيء بتنذبح بالأول، مرات الذبايح قليلة ومرات كتيرة، وفيه دجاج بقدر يعافر ويرجع بعيد عن إيد الذباح وفيه مقدرش يهرب لآخر القفص على اعتبار انها المنطقة الآمنة يلي حتى الدجاج يلي بهرب عليها بنذبح.
ذبحها مفيد وبتجيب فلوس بنظر الذبّاح، وكل مذبح عدد أكثر كل مصار الربح أكبر وأوسع، وفيه مستفيد ثاني حابب ياكل دجاج طازج مشان شهيته مفتوحة عاللحوم وبحب بطنه كثير.
الدجاج كمان بشرب مية وبياكل علف، لأنه من مصلحة الذباح انه الدجاج ياكل لأنه لو مات من الجوع مش حيسترزق ويبيع ويذبح، لازم ينذبح ذبح مش لازم موت طبيعي، لكن كله والدجاج جوا القفص.
حتى مرات فعلاً كنا نشوف دجاجة قدرت تنط من باب الصندوق وقت ينفتح وتجري بين رجلين الناس بالأسواق تبحث عن النجاة هاربة من السكين.
بحس حالنا زي هالجاجات بالصندوق، حصار بصندوق مقفل، كل شوي دجاجة بتنذبح، ذبحها برضي شهية البعض، ومربح للبعض، وممتع للبعض، باقي الدجاج بضل شاعر بخوف بعرفش متى مصيره، بياكل وبشرب يستنا مصيره، مجبور يضل بالقفص فش عنده خيارات، كل الخيارات مش ملكه، ملك الذبّاحين والسكاكين.
الأكيد احنا بنقبلش ع حالنا نكون دجاج، احنا حنعافر وما بنستسلم.
ياسر الحَطّاب
٣٠/٣/٢٠٢٥
