مشهد جوع شعبي قاتل، بس كمان في مشهد بيزيد قتلي كل لحظة، إني طول الوقت بتذكر كيف عزة أهلنا وناسنا بغزة، كيف بنعزم فنجان القوة وكاسة الشاي على مارق الطريق الغريب، كيف أهلنا بيتفننوا كيف يكرموا ضيوفهم، لو حد أجى على بيت بغزة وقت الغدا وهم طابخين بامية مثلا، بيبعت إبنه الصغير بيقله روح هات كيلو كباب، عشان يغدي ضيفه.
بتذكر ابن جيرانا لما يدق الباب ويقول: بتسلم عليكم ماما وبتحكيلكم خدوا صحن الكعك هاد عملته لسا طالع هلقيت من الفرن، عزومات رمضان اللي الناس بتتنافس فيها مين يعزم بالأول.
تلاقي الأم طابخة طبختين، عشان جوزها بيحب السبانخ وأولادها بدهم ملوخية.
اليوم أهلنا بيوقعوا من الجوع، آخ من هيك وقت.
كريم أبو ضاحي
20/07/2025
