اليوم من الصبح وقفت لي إيناس على باب الخيمة حكتلي:
“عمتو صباح النور، اليوم عيد ميلادي…بدي طربوش زي ما حكيتيلي بس اوعك ينسرق او يضيع منك”.
بعد الدوام لفيت كل السوق على طربوش بطلوع الروح لاقيت محل عنده شوية طرابيش اكلتهم الغبرة، حكيت للبياع:
“بدي طربوش” حسيته ضحك ضحكة باهتة وقال باستغراب:
“طربوش! والله زمااااان ما حدا سأل عنهم حتى نسيت انهم موجودين عندي”
أخذت الطربوش وأنا ببالي ضحكة إيناس بس أوصل المخيم وتلاقيني ع باب الخيمة، كيف رح تملا الشارع رقص وفرح…
كنت ماسكاه وكل الشارع بيتطلع عليّ انه ايش هالكائن هاد اللي ماسك طربوش، يمكن الطربوش كان الجزء الوحيد الملون في مشهد الدمار في غزة اليوم، حتى انه شاب كان راكب على عربة الكارو سمعته بيقول لصاحبه:
“إلحق…إلحق انتبه، طربوش” وكإنه رمز لإشي نسيناه، إشي بطلنا قادرين حتى نستذكر فرحه.
لما نزلت من على عربة الكارو مشيت بشارعنا الطوييييل وتحت الشمس الحارقة بس كانت زينة الطربوش بتلمع تحتها، نسيت الحر وركزت بالإضاءة اللي عكستها الزينة عالأرض وأنا ماشية، طفل صغير مشى جنبي حط ايده على دقنه وقعد يتطلع مستغرب شو هاد، حسيت بزعل انه الأطفال مش عارفين ايش هاد, طفل زيه تقريبا عمره ٣ سنوات من عمر إيناس، ما بيعرف ايش يعني عيد ميلاد وايش يعني زينة هاليوم وطربوشه الملون.
بعد شوية، شباب ماشيين، صاروا يحكوا لبعض كل عام وأنت بخير، ما ضجرت بس حسيت بالفرح انهم متذكرين.
أما احلى اشي كان لما صادفت أطفال ماشيين ومن بعيد صاروا يركضوا علية يتفحصوا الطربوش وكإنه كنز قدييييم مش شايفينه من عقود، وصاروا يقولوا لي كل عام وأنت بخير، وعيونهم ما فارقت الطربوش.
فرحت إني كنت أحكي لإيناس عن هالإشي من قبل، حتى لو احنا في حرب، مش لازم ننسى طقوس فرحناونحاول نعيشها بأقل الإمكانيات.
كل عام وحفيدتنا إيناس بخير❤️ وأحلى شنطة اناناس لعيون ايناس🍍
أصيل سلامة
24/8/2025
