زمان كنت أحب النقاش، وأحب أكتر لما أشعر إني قادر أعرض وجهة نظري بشكل منيح، وكنت حتى لو لقيت حد كاتب فكرة خاطئة من وجهة نظري أدخل أناقش وأفند الخطأ، من سنتين صار عندي قناعة بإنه كل شي صار سخيف وبلا معنى، وشو الفايدة أصلا من النقاش؟ بعيدا عن أنه الغالبية العظمى من الناس هدفها من خوض النقاش هو الانتصار لفكرتها مش الوصول للحقيقة حتى لو فكرتها هاي بمنتهى العبث، بس السبب الأهم لتجنب النقاش هو إنه غزة ضاعت، فكل شي بعد هيك بالنسبة الي ملوش معنى، شو يعني الذهب طلع ولا نزل؟ صورة ترامب مع كلينتون حقيقية ولا لا؟ الفيلم اللي حصل على أوسكار هل يستحق ولا لا؟ فلان الليبرالي ظهر إنه أصولي، كلها أشياء ما بتعنيلي ولا بتهمني، تفاعلي من الأحداث صار هادئ تماما، انفعالاتي قلت جدا، وصرت لما اشوف بوست كان يستزفني زمان الآن صرت أكتفي إني أقول بعقلي: ما اهبلك، بقولها وبقلب عالريلز أو بروح أعمل نمورة.
كَريم أبو ضاحي
5/2/2026
