جنب ما أنا مقيمة بدير البلح افتتحوا قاعة أفراح ليس كما خطر ببالك، بعض من الشوادر وكم لوح خشب وكم مسمار وكهربا مولدات ودي جي من أيام واحد اسنين سلاسة.
يعني ألف مبروك للعروسين وبالرفاه والبنين. المهم بشكل شبه يومي يقام في هذه القاعة أعراس تقول الشعب نفسه انفتحت صلاة النبي شعب حي ياعمي وفش وقت ورانا صراع ديموغرافي بدنا نفوز فيه.
كمان مرة المهم جدول هالعرس ببلش من الساعة الرابعة بعد أذان العصر تحديداً. ويستمر قرب أذان العشاء ـ الشعوب المتدينة بطبعهاـ بتحافظ على شكل أيديولوجيتها يختي علينا وعلى أيديولوجيتنا الرايقة. بين العصر والعشا بيجي أذان المغرب يتوقف الدي جي طبعاً. يعني بدك ربنا يسخطنا استغفر الله بيخلص الأذان من هان وبيختم المعازيم دعاء الأذان وبتعود البهجة والأغاني والدي جي ينادي ع عمات العريس ويرجو الإنتباه انو الكرسي الأول هاد لخالتو اللي مصابة وبرجلها في بلاتين. ما علينا في هالقاعة في جدول أغاني ثابت أهمها بتلاقي حالك بتسمع مين حبيبي أنا بصوت وائل كفوري ونوال الزغبي وبتسجيل تسعيناتي ملزق بمناكير. وفجأة بتلاقي أغنية لو إنت نار أنا مية لو إنت قسوة أنا حنية طيب يعني ايش هالعجقة؟
هلأ إنت بتعيش بخضم هالأحداث وبتسمع وبتحاول تخترع نوستالجيا الغلابا قال يعني الحنين والاغتراب مقطع بعضه بهالبلد ورشة تناقض وعبث بتكون ناقعهم قبل بساعة لتستوعب أسلوب غزة بإعلان جدارتها بالحياة الله يسامحه هالشاعر بس.
بيخطرلك انو بكرا العالم كله رح يعيش مرحلة التقدم بالزمن بل السفر عبره للزمن إلا بدير البلح رح تروح تستعيد زمن وتجيبه من ايده وتغنيلك خمسة خمسة بس بتوزيع حميد الشاعري.
اييييه يلا هو حد لاقي زمن أصلا ياعمي.
خللص يا دير البلح بكفي استثمارات!
فِداء زيّاد
15/2/2026
